بيان مجلس الثّورة الأوروبيّة بتونس

ملّي بن علي صحّح اتفاقيّة الشّراكة مع الاتّحاد الأوروبّي ولّات تونس ولاية أوروبّية و  ولّا شعبها يد عاملة رخيصة مدمنة على الاستهلاك  الحاجة إلّي تخدم مصالح الشّركات الأوروبيّة و بالأخصّ  الشّركات متعددة الجّنسياتو.

أمّا حرّية تنقّل السّلعة متبعتهاش حرية تنقّل العباد   المواطنين والمواطنات التّوانسة مخذاوش حقوقهم المدنيّة الكلّ بالرّغم إليّ هوما كانوا الدّجاجة إليّ تبيض في الذّهب للاتّحاد الأوروبّي.

علا هاذاكا التّرحيب إلي يلقاوه الأوروبّيين رجال و نسا مش كيف  التّرحيب إلي يلقاوه التّوانسة في أوروبا  علخاطرهم مزّالو موش مرغوب فيهم على أراضي الاتّحاد الأوروبّي.

بما انو الأوروبّيين ينجّموا يدخلوا لتونس و يحوّسوا  فيها كيما يحبّوا عكس التّوانسة إلّي مايتمتّعوش   بالحّقوق هاذي بالكلّ.

بلغة أخرى اتفّاقية الشّراكة هي في الأصل اتّفاقية إخضاع تأسّس لنظام حماية جديد

ولّات  الولاية التونسيّة  مديونة للبنوك  و حكومات الاتّحاد الأوروبّي. الفوائد متاع القروضات هاذي كبيرة بالنسبة للتّوانسة بٱرّغم إلّي هيّا قطرة في بحر بالنّسبة للأزمة الماليّة إلي يعيشها الاتّحاد الأوروبّي٠  راهي فلوس قاعدة تتنحّى  كل يوم من الميزانّة الوطنيّة المخصصّة للتّعليم والصحّة والتّنمية بصفة عامّة  في تونس.

بطبيعة الحال الثّورة التونسيّة ماكملتش الزّين قطّع أما ماكينة النّفوذ والفساد إلي صنعهم أيّام حكموا مازالوماتنحّاوش.  الشّعب التّونسي مازّال ما ذاقش طعم الدّيمقراطيّة الحقّانية  ..

على خاطرهاذاكا الكلّ لازمو يلقى طريقو وحدو من غير نصائح من صحابو إلي عرفهم بعد 14 جانفي 2011 و إلّي كلّ واحد من ها الحبيّبات الجدد إلي من مدريد و فرصوفيا وبرلين  و ميونيخ و بوخارست٠ كلّ واحد منهم داز فيها يعرف مصلحة البلاد  و يحبّ يفرض نموذج الانتقال الدّيمقراطي متاعو معاها كمشة وعود و دزّة فلوس. أما الأزمة لليوم تضرب تصرع في اغلب هاكا البلدان إلّي تحبّ تعاونّا  ابداها من  اليونان و اسبانيا وأنتي ماشي ٠ هذا الكلّ يفسّرلنا الطّريق المسدود إلّي وحلت فيه  اغلب الدّول هذه وقت تعدّات من الدّيكتاتوريّة إلى ديمقراطيّة السّوق تحت إشراف أسيادها البانكستار٠ ملايين من الأوروبّيين احتلّوا السّاحات العامّة  متاع أثينا و مدريد و برشلونة ولشبونة وبرلين و فرانكفورت و باريس و لندن و بلايص أخرى. اللّي  قادوا التّحركات هاذي سمّاو رواحهم المتيقرين  و دخلوا التّاريخ من بابو الكبير باعتبارهم هزّوا دول الاتّحاد الأوروبّي. وبالرّغم تنوعّهم  جمعتهم حاجة وحدة الّي هي رفض تدابير التقشّف اللّي فرضتها مؤسّسات الاتّحاد الأوروبّي على بروكسيل و فرانكفورت وبرلين.على خاطر ها المؤسّسات هاذي تحب الشّعوب تخلّص فاتورة خساير الأزمة الاقتصاديّة العالميّة على حساب المكاسب الاجتماعيّة في القطاعات العموميّة و الخاصّة كيما التّعليم و الصحّة والضّمان الاجتماعي و منح التقاعد و التنقّل والطّاقة.    

  شعوب أوروبّا خاصّة الشّباب المهمّش اللّي حاسس روحو بلا مستقبل ثار على  النّظم التّفويضيّة وبعبارة أخرى الديمقراطيّة  التّمثيليّة اللّي يعتبروها متمثّلهمش.هذا اللّي خلّا النّضال أمر واجب باش نحافظو على المقوّمات الأساسية للعيشة الكريمة  الّي تكفل حقوق المواطنين والمواطنات . على هاذاكا شعوب الاتّحاد الاوروبّي ولّاو يعيشوا نفس القضايا والهّموم اللّي يعيشوها شعوب جنوب المتوسّط و منها تونس.

نحنا مواطنين وموطنات العالم الّي  نعيشوا في تونس نعتبروا رواحنا طرف فاعل في إلّي قاعد يصير توّه ٠مجلسنا هاذا يحبّ يولّي جسر تواصل بين شعوب أوروبا وتونس وحوض المتوسّط كيما سفارة متنقّلة للاتّحاد الاوروبي٠ بطبيعة الحال موش اتحاد الحكومات و السّياسيين المرتشين أمّا اتّحاد شعوب يقسموا نفس الهموم والمشاكل هذاكا علاش قلنا نلمّوا بعضنا باش نقرّبوا بين الحضارات و نوعيّو بعضنا  و نتحرّكوا بصفة جماعيّة.

تعلّم
نحبّوا نستعملوا كلّ الوسائل الموجودة باش نخبّروا المواطنين و المواطنات  التّوانسة بالّي قاعد يصير في أوروبا  وزادا نخبّروا المواطنين و المواطنات الأوروبّيين بالّي يصير في تونس.

ٱقرب
نحبّوا نأسّسوا شراكات أفقيّة بين مجموعة من مواطنين الأوروبيين و الّتوانسة  باش نخلقوا مشاريع بديلة تشجّع على الإبداع الذّاتي.

تحرّك  
نحبوا نساهموا محلّيا في مبادرات تقوم بها حركات التّعبئة الاجتماعيّة  في أوروبا الي تشرّك رجال و نسا توانسة متولهين بالقّضايا هاذيكا .

كلّ مواطن ومواطنة من أوروبا  أو من تونس مهتّم بالموضوع هاذا ينجم يتّصل بنا و يشارك في نشاطاتنا.

مجلس الثورة الأوروبية بتونس، ابريل 2012

reveurotun12@gmail.com   http://thouroubtou.blogspot.com   
http://www.facebook.com/EuropeanRevolutionTunis  http://www.youtube.com/thouroubtou